Ua faamaonia mai e le Komesina o Leoleo le tofa Auapaau Logoitino Filipo, le toe faaulu atu o se isi tagi o tuua’iga o le solitulafono o le faia o ni tala taufaaleaga, faasaga i se tamaitai Samoa e aumau i Amerika, ae o loo malaga asiasi mai i lo tatou atunuu.

Ua faailoa mai foi e le faauluuluga o le Matagaluega o Leoleo, Falepuipui ma le Ola Toe Fuataina, o loo faagasolo suesuega i lea mataupu ma e lei faia ni moliaga seia mae’a sailiiliga e iloa ai le iai o ni mau e mafai ai ona molia lea tamaitai.

I le tagi a le Minisita o Galuega tetele faasaga i le taitai o le vaega e puipuia aiātatau a tagata ua tuua’ia ai foi i le faia o ni tala taufaaleaga ua afaina ai lona tagata o lona aiga ma lona itumalo, e mafua i se taavale pikiapu landcruiser a le Malo e faapea ua lesitala i lona suafa o sana meatotino, ua faailoa mai e le Komesina o leoleo ua lata ina mae’a suesuega i lea mataupu ma e tatau ona mautu tapenaga uma i le vaiaso fou ona iloa ai lea o le faia ma le lē faia o ni moliaga e fua i mau o le a maua i suesuega a leoleo.