Tusia: Maina Misa Foma’i-Vai
Ua faaui i tua e le Faamasinoga Maualuga moliaga e tolu e aofia ai ma le moliaga o le fasioti tagata pa’ivalea, o le faaoomanu’a matuiā, ma le faaoomanu’a faasaga atu i le alii Faifeau le Susuga ia Poasa Leaupepe. O le mafuaaga ona e lē lava mau. O le mataupu na faatulaga mo le fofogaina o mau ma iloiloga a le Faamasinoga Maualuga i le asō, peitai o lea ua suia nei. O le moliaga e tasi o loo totoe o le faaoolima lea ua faamauina le tali ioe iai o lē ua molia.
Sa fesiligia e le Afioga i le alii Faamasino Fepuleai Ameperosa Roma pe aisea na molia ai lē ua tulai i moliaga nei i le amataga…..” Why was he charged with all those charges in the beginning? Those are serious charges”. O loo faapea mai le itu a leoleo na faaoolima lē ua molia i lē ua maliu i le aso 4 o Fepuari 2020 ae faato’ā maliu i le aso 28 o le masina lava lea. Ma o le faavae o le talosaga e faaui i tua ona e lei lava mau.
Na ta’ua foi o loo maua i le lipoti a le alii fomai a’o lei faia le ta’otoga faapitoa o lē ua maliu o le mafuaaga ona o le gasegase o le leukemia. Ina ua mae’a foi le ta’otoga faapitoa na faailoa foi i le lipoti o āuga o le gasegase lava lea na maliu ai. Na talia e le Faamasinoga le talosaga e toe faaui ai i tua moliaga e tolu, ae talu ai ona o le moliaga o le faaoolima e i lalo lea o le malosiaga o le faamasinoga maualalo lona su’esu’eina ua mafua ai ona tuuina atu i le Faamasinoga Maualalo lea mataupu i le aso 14 o le masina nei e faatulaga mai ai se aso e su’esu’eina ai.
O le mataupu lenei na tulai mai i le vaitau tonu o loo pepesi le faama’i o le misela i le atunuu ia Fepuari 2020. O lē ua molia sa faifeau ai i le Ekalesia Metotisi i Safotu, o lē ua maliu o se tasi o fanau a le ekalesia.
