Sa tomua i faaletonu tapenaga a le tatou aulakapi liki o le Toa Samoa ina ua amata le taamilosaga o le Ipu o le lalolagi i le taaloga lakapi liki, ina ua fasi faamo’amo’a e Egelani i le tatou pulu i ‘ai e 60 i le 6 a le Toa Samoa.
Peitai o le toe feiloai o le tatou ‘au ma Egelani i semi finals, e lei toe tuua lava e le Toa Samoa se avanoa e tafili saunoa ai Egelani i lona malosi sa iai muamua i le taaloga tala malae o le taamilosaga.
E pei ona sa maimoaina e le atunuu ma le lalolagi o tagata Samoa i soo se tafa o le kelope, e fa’i o le osofai mai o Egelani, ae o le osofai malosi atu o le tatou ‘au lea na oo lava ina tutusa ai ‘ai i le ta’i 26 ma mae’a le taaloga, ma faaopoopo ai le taimi auā e tasi lava le ‘au e sao i le sailiga o le siamupini.
O le tatou a’a i le pou le drop kick na maua ai lo tatou ‘ai e tasi, ma 27 ai le Toa Samoa i le 26 a Egelani ma tatou faatuina ai se matati’a i le lakapi liki, o se atunuu laititi muamua o le Pasefika ua sao i le sailiga o le Ipu o le lalolagi i le lakapi liki.
Sa molimauina i faasalalauga i luga o fesootaiga i upega tafailagi, sa auai le afioga i le Sui Palemia ma le Minisita o Tupe i le taaloga, aemaise o le taimi o loo sauni i le taaloga.
O le afioga i le Sui Palemia le afioga Tuala Tevaga Iosefo Ponifasio ma lona faletua faapea le Minisita o Tupe le afioga Mulipola Anarosa Ale Molioo sa auai i se fono faavaomalo sa usuia i le atunuu o Sepania, ma faapena ona afea ai Peretania tele e avea ma sui o le Malo ma le atunuu e momoli le faamlosiau ma le lagolago aemaise o le tapuaia o taaloga o le quarterfinals ma semifinals a le tatou Toa Samoa.
Sei avatu lava leo o le fiafia i le tapuaiga a le atunuu i le vaveao o le Aso Sa ina ua mae’a le taaloga e pei ona sa le popole le toatele pe iai se pemita faataga mai leoleo, ae vaaia le tumutumu o magaala o le taulaga i Apia.
O leo o pu o taavale ma faaumuumu o le loto fiafia i le taeao po o le Aso Sa i le taulaga o Apia, a o lei tata logo o lotu o le taeao ina ua manumalo le Toa Samoa ia Egelani ma faamautu ai lona sao atu i le sailiga o le siamupini o le Ipu o le lalolagi i le lakapi liki.
O le vaveao foi o le Aso Sa o muamua nei le aso 20 o Novema o le a saili ai e Toa Samoa ma Ausetalia poo ai o le a avea ma siamupini o le lalolagi i le lakapi liki.
