O le aoauli ananafi i Matu o Aukilani na taumafai ai i latou sa i le matafaga e laveai mai le ola o se tasi foi o tama a o faatali le oo atu o leoleo ma taavale a le falemai.
E ui i nei taumafaiga uma e lei mafai ona toe laveai mai ai, ma o lona maliu o le toaono ai lea o tagata maliliu i totonu o le 48 itula i totonu o Aukilani.
O le Aso Toonai i Matu o Piha lea na maliliu ai le isi toalua, ma e faapea o i laua nei o ni tagatanuu Initia e le gata e le iloa aau ae e lei taeele foi i totonu o fu’a o loo faailoga ai vaega o le sami o loo fautuaina e faaaoga.
O se faanoanoaga tele i le vaega o loo gafa ma le laveaiina mai o tagata taeele le lē amanaia o faailoilo ua mae’a tapenaina mo le saogalemu, ma e le o faitioina lava e le Water Safety le sami ma ona galu peitai o tagata Niu Sila lava i le lē faia o le faaiuga sa’o.
I se lipoti mai le Hai Komesina o Initia i Ueligitone ananafi e pei ona ta’ua i tala a le Herald o lea ua maua fesootaiga ma aiga faanoanoa o i laua nei.
E ese mai i Aukilani, ae o le vaiaso talu ai foi lea na lipotia mai ai le isi toatolu sosoo na maliliu i Otago ma Coromandel.
