O se lipoti i le taeao analeila ua faamaonia ai le faatupula’ia pea o soifua ma’umau i luga o alatetele i totonu o Ausetalia.
I le 12 masina mai ia Mati 31 e na o Niu Sa Uelese ma le Northern Territory e lei faamauina se siitaga i le aofai o tagata maliliu i faalavelave i le alatele, peitai o le asō ua faailoa mai e 1,204 tagata maliliu i luga o alatetele i Ausetalia atoa i le piliota lea e pei o faamaumauga mai le Australian Automobile Association.
Fai mai ua tusa ma le 19 pasene ua maualuga atu ai nai lo le taulaiga e pei ona iai i le National Road Safety Strategy.
Ua faamaonia foi le faatupulaia o tagata maliliu i luga o le auala i totonu o le lima tausaga i le atunuu ma e talu mai le masina o Ianuari 2021 ua maitauina le siitia o tagata maliliu i le 9.8 pasene i le tausaga.
O le asō ua amata faamamalu ai le vaiaso faapitoa mo le saogalemu i luga o alatetele i totonu o Niu Sa Uelese.
