Ua faaalia ai e le faalapotopotoga o le ma’i sela a Niu Sila, le Asthma and Respiratory Foundation NZ, o tamaiti laiti nei o loo latou tagofia paipa miti asu (vapes) a o faapea ona saosaoa le alumia o lea oloa i tupulaga talavou.
O se faamatalaga ua faia a o alia’e le maketi o nei paipa miti asu i totonu o aoga, e pei ona faalogo iai le faavae o faiaoga mo aoaoga mo tupulaga talavou e uiga i vapes i totonu o le atunuu aoao.
O Sharon Pihema, o se tasi o le aufaigaluega e toalua sa ofoina le tautua mo le aoaoina o tupulaga i totonu o aoga i aafiaga e mafua mai i le ulaina o nei paipa asu.
Sa ia faaalia ai, e lē o faate’ia i le faalogo i nisi o tala e uiga i lea faafitauli.
E faatoa mae’a atu nei sana tauaofiaga faaleaoaoga mo tamaiti aoga tausaga fitu ma le valu, lea sa ia faaalia ai ananafi, o le tulaga masani ua iai le ulaina o nei paipa asu e tupulaga talavou, ua lē mafai ona toe taofiofia.
Ma ia ta’ua ai, mai i tamaiti sa ia asia i se tasi o aoga, o le 73 pasene o tamaiti sa ofoina iai se paipa miti asu, 77 pasene o i latou sa taumafai e ulaina nei paipa asu, 88 pasene o i latou e talitonu o se ma’i pipisi i tupulaga ua iai le ulaina o nei paipa asu ma le selau pasene e lei tagofia lava le tapaa i o latou olaga.
Na faaalia e le Ofisa Sili o le faavae a le Asthma and Respiratory NZ ia Letitia Harding, e moomia e le malo ona feala i luga ma tilotilo i lea vaisu i tupulaga talavou i le ulaina o paipa asu, o se faafitauli e ese mai ai i le fuafuaga o le saoloto mai i le ulaula tapaa.
O se manatu ua faia ina ua mae’a ona folafola e le faigamalo soofaatasi lo latou soloia o le sini autu e taulamua i le lalolagi i le avea lea o Niu Sila ma atunuu e saoloto mai le ulaula tapaa i le 2025, o se taulaiga sa taula’i iai le Labour.
Na faaalia e Harding, afai o nei faamatalaga i le matautia ua iai tupulaga i le ulaina o paipa asu e lē o lava mo le malo e feala ai i luga, e na te lē iloa la pe o le ā le isi mea e faia e feala ai i luga.
