Ua folasia nei se lipoti, ua faailoa ai taunuuga o se su’esu’ega na faatautaia e le Iunivesite o Otago, e aofia ai tamaitai faipule e 11 mai vaega faaupufai eseese o le atunuu.
Mai su’esu’ega na faailo ai e nei tamaitai faipule lo latou feagai ai ma le tele o faafitauli e pei o faiga tau faamata’u e faia faasaga ia i latou e faaaogā ai a’upega mata’utia, o faamatalaga matagā ma le lē taualoa, ma faiga ua tauau ina lepetia ai ma le saogalemu ma le tamalii’aga a i latou ma o latou aiga.
Faailoa e le faipule a le Leipa, Ingrid Leary e lē o se faafitauli fou lenei mataupu peitai ua mātauina le faateteleina ma le ogaoga o gaioiga e faia faasaga i tamaitai.
Faaalia e Ingrid, ua iloga ai lava le lē amana’ia o faipule tamaitai, ma le lē migao o uiga e faaalia atu.
Ua vaaia le loto ita ma le lē fiafia e ala i faaupuga mata’utia e talafo atu ma gaioiga e latou te faia i tamaitai, e pei o le faia o uiga matagā.
Ua tonu ai manatu o Ingrid Leary, e foliga ua talia ia faiga ma faaupuga i totonu o le sosaiete, ma lea ituaiga galuega, ae e lē tatau ona alia’e lea tulaga.
Ta’ua i lipoti, e lē gata ina faaaogā ia faamatalaga mai sui faipule ae sa faaaogā foi nisi o faamatalaga mai luga o upega tafa’ilagi mo lenei su’esu’ega.
Na faailo e se sui na faatautaia ia su’esu’ega ma tusia lea lipoti, le telē o le lu’itau o le feataia’i ma sui faipule ma le moomia ai o le faia o ni ta’iala ae o se fuafuaga e latou te mata’itūina nei mataupu, ina ia mautinoa le malupuipuia o sui uma.
Ua fautuaina foi le malo ina ia toe iloilo tulafono taufaaofi o loo iai nei i tulaga o uiga lē migao ma le tau faamata’u i luga o upega tafa’ilagi.
Puna o Faamatalaga: https://www.rnz.co.nz/news/national/557570/research-finds-rape-threats-against-female-mps-common
