Na faatumulia le malumalu a le Apia Harvest Centre i Samoa i aiga, uo ma ē masani, tainane lana afioga i le Ao Mamalu o le Malo, Sui o le Fono a Sui Tofia ma lona faletua, le Sui Palemia ma le Kapeneta, le taitai o le Itu agai, faapea sui mamalu uma o le Palemene na auai e molimauina toe sauniga o lē sa avea ma Minisita o Felauaiga ma Galuega Tetele a le malo i le paeaiga a le faigamalo ua tuanai atu, le afioga Tapunuu Papalii Niko Lee Hang.
E pei ona silafia o le masina o Novema na tuumalo ai le afioga Tapunuu ae o loo avea ma faipule o le itumalo a Vaimauga Nu.3. Ua silia ma le 20 tausaga o iai Tapunuu i upufai o malo ma sa filifilia foi e avea ma Minisita o Tupe i le tausaga i le 2006, mulimuli ane avea ma Minisita o Felauaiga ma Galuega Tetele a le Malo i le tausaga 2016.
I le palota o le tausaga na tea nei na toe filifilia ai Tapunuu e avea ma faipule o le Vaimuga Nu.3. O se tamalii ua loa lana tautua mo Samoa, ma e tuumalo Tapunuu ua 68 tausaga o lona soifua.
O le asō na faatofa atu ai aiga ma uo mamae faapea sui o le Palemene lona 17 a Samoa i le afioga Tapunuu a o faia ai ona toe sauniga.
E toalua ia Tapunuu sui o le Palemene ua tuumalo i totonu o le 12 masina talu ona mae’a le faigapalota tele a le atunuu i le tausaga 2021.
