O loo tapena e sui o le Pulega a Aukilani ma nisi o taitai o komiuniti a Aukilani i Saute ni nofoaga (fan zones) o le a potopoto uma i ai soo se tasi o fuafua e faaali lana lagolago e tapua’ia ai le alofaiva o tamafanau a Samoa o le a latou tauina le taua faaiu e sailia ai le siamupini o le lalolagi i le faagatama o le lakapi liki.
Ua faamautinoa mai e se tasi o sui o le Komiti o loo tuufaatasia le Polokalame susuga Pastor Lui Ponifasio i luga o le polokalame a le Malu Taeao a le Radio Samoa i le taeao nei, o le a faia se faatasiga faapitoa i le David Lange Park i Magele, i le aoauli o le Aso Toonai nei a o aga atu ai i le taaloga autu i le vaveao o le Aso Sa, i le 5am i le taeao.
O se fuafuaga na faatalanoaina e taitai uma o le Pasefika i totonu o Aukilani i Saute, sa aofia ai ma le afioga i le alii minisita ae o ia foi o le Faipule o Magele, le afioga Aupito Su’a William Sio, ina ia faatulaga se nofoaga e agai uma atu i ai le au lagolago e faaali ai lo latou valevale alofa i le latou ‘au le Toa Samoa, ae i le taimi e tasi, o loo faatulaga lelei i se faiga e saogalemu ai mo tagata uma.
Na faalautele mai e Pastor Lui le tulaga ua iai le polokalame e faapea o se konoseti e amata foi i faigalotu e pei ona masani ai, o se aso faaleaiga e omai ai le aiga ma le fanau, pe omai lava ma aumai o se picnic day o le a iai foi aufaipese ma se konoseti o le a tapena iai mo le faamoemoe e amata i le 2 i le aoauli.
Ta’ua foi e Ponifasio o loo tele lava isi tapenaga mo le taimi nei o loo galulue ai le komiti faapea foi le council ma leoleo ina ia malupuipuia ma saogalemu lea faamoemoe ae masalo o se taimi o i luma, i le taeao nei poo le aoauli nei o le a fofoga aloaia ai le atunuu i tulaga uma e uiga i lea faamoemoe.
Na fautuaina ai foi le mamalu o le atunuu aemaise tupulaga ina ia tautuanā le saogalemu ma manatua e tapuai faatamalii aua le alofaiva o tamafanau a le atunuu i le latou taaloga faai’u o le ipu o le lalolagi a le Lakapi Liki.
O lenei polokalame o loo lagolagoina malosi e le Matagaluega o Tagata Pasefika, Laulau a fono a Mangere ma Otahuhu, Auckland Council, Pacific Media Network ma le Radio Samoa.
I luga o le facebook o loo faailoa ai foi le polokalame mo le isi fan zone ua tapenaina i le pitonuu o Otara i le Aso Toonai nei lava a o faatalitalia le taaloga i le Aso Sa.
O le 5pm agai i le 10pm o le a faia ai ni faafiafiaga i le main stage i le taulaga faatau a Otara, ona toe iai lea o le fuafuaga o le a faatulaga se screen telē i tua i le kapaka i Otara lava o le a maimoaina ai le taaloga i le 5am i le vaveao o le Aso Sa.
O loo faamamafa mai e i latou uma o loo faamaopoopoina nei nofoaga uma e lua, o le a matuā faasāina le taumafaina o le ava malosi i nei nofoaga, ma e le faatagaina foi le oo atu o nisi ua faasuaavā; o le a mautu lelei le leoina o nei nofoaga e i latou ua faatulaga e puipuia le saogalemu aemaise le tausisia o le tulafono.
