O lea ua maua i ni molimau faatuatuaina o le vaiaso fou e toe amata su’esu’eina ai e le Faamasinoga o Fanua ma Suafa nisi o mataupu tuua mai le taimi a o lei amata faamamaluina le Tulafono Fou o Fanua ma Suafa lea ua toe ave i le Palemene mo se isi iloiloga ma teuteuga e mafua i ni fesuia’iga na toe faia iai, ae ua mae’a ona pasia lea tulafono ia Tesema o le tausaga e 2020.
Ua faailoa e le molimau ua mae’a ona ave tusi i itu tau faamasinoga ua logo iai aso ma taimi e fofogaina ai a latou mataupu lea o le a tagofia e faaaogā ai ni vaega o aiaiga o le Tulafono o Fanua ma Suafa o le tausaga e 1981.
E pei ona silafia o aiaiga o le tulafono tuai ua toe faaaogā ni vaega, o loo aiaia ai le iai ma Faatonu poo asessors i le su’esu’eina o mataupu, peitai ina ua soloia lea tulafono na soloia ai ma le toe faaaogāina o Faatonu e lagolago ma fesoasoani i su’esu’ega a lea faamasinoga tāua a le atunuu.
O le faai’uga a le faamasinoga sili i le talosaga a le Peresetene o lea faamasinoga ina ua taofi le faaaogāina o le tulafono fou, ona o ni vaega e lei mae’a ona faaofi iai, na faatonuina ai le toe faaaogā o le tulafono o le 1981 i ni vaega e faasino tonu i mataupu sa su’esu’eina a o lei amata faamamalu le tulafono fou i le masina o Mati o le tausaga na te’a nei.
