Ua mae’a nei galuega sa toe faaleleia ai le tasi o vaalele Twin Otter o le Samoa Airways ma o le a toe foi ai i le 3 vaalele faapea e faia malaga i le va o Samoa e lua.
Ua faailoa e le pulega o le kamupani vaalele a le atunuu o le toe faaleleia o le isi o ona vaalele o le a amata ai loa i le Aso Gafua 25 o Setema ona faia ana malaga i le va ma Amerika Samoa, auā o le taimi nei e faatoa faatino ana malaga i le Aso Lua ma isi aso o le vaiaso.
Ua faailoa foi e le kamupani vaalele e 3 ana malaga o loo faia i Aso Sa, fā malaga ua fuafua mo le Aso Gafua ae lima malaga i isi aso o le vaiaso ma o malaga uma o loo faatautaia mai i le malaevaalele i Fagalii.
O suiga ia ua faatino i le tuanai o vavao o le faama’i koviti, ma le toe tatala o tuaoi i malaga masani talu mai Aokuso o le tausaga ua mavae.
