Ua faamautu le aofaiga o tagata mai Samoa e malaga i galuega faavaitaimi mo Oketopa ma Novema o lenei tausaga, i se finagalo ua faaiugafonoina e le Kapeneta i le vaiaso nei, a o faaauau ai pea le isi faaiuga e na o le taitasi i le masina ona ave i Niu Sila ma Ausetalia aumalaga o tagata faigaluega faavaitaimi ua mautu uma a latou tapenaga.

Ua faailoa e le taitai o le Malo le afioga i le tamaitai Palemia, Fiame Naomi Mataafa, e 619 le aumalaga mo le masina nei o Oketopa, ae 1,047 tagata faigaluega faavaitaimi e malaga i le masina fou o Novema. 

Ua faia lea faai’uga a o tālia ai le iloiloga a se komiti a le Kapeneta ua feagai ma le galuega o le toe saili o se isi auala e filifili tonu ai tagata mo ia galuega, aemaise o le amataga mai o le polokalame sa faasino tonu ia i latou e le o faigaluega.