O ananafi na toe valaau ai le mataupu a le alii o Talalelei Pauga i luma o le faamasinoga maualuga.
Ma o lea valaauga ua faamautu ai le aso 3 o le masina o Aperila o le tausaga nei e iloilo ai i luma o lana afioga le tamaitai faamasino o Niavā Mata Tuatagaloa le talosaga a Talalelei Pauga e tatau ona faasee ese le tamaitai faamasino mai le iloiloga o lana mataupu.
O Talalelei Pauga e toafā iai alii na tuuaia i le taupulepule e faaoo le maliu i lē sa avea ma Palemia o Tuilaepa Sailele Malielegaoi.
O se tasi o mafuaaga a le tamaitai loia o loo tulai mo Talalelei Pauga o Josephine Sapolu, ona o le tamaitai faamasino sa faafoeina nisi o iloiloga a i latou e toatolu o loo tuli o latou faasalaga ona o moliaga i le mataupu lava lea e tasi.
E talitonu le tamaitai loia a Talalelei Pauga, sa iai le aafiaga o le tamaitai faamasino i le faafoeina o le mataupu a i latou ua falepuipui nei.
I le valaauga o lea mataupu i le masina na se’i mavae atu nei na faaailoa ai e le faamasino o Nelson ia Pauga, mai faamasino uma o le faamasinoga maualuga e na o le tamaitai faamasino lava o Tuatagaloa o loo mafai ona ia iloiloina lea mataupu.
Faailoa e Nelson afai ae talia e le tamaitai faamasino le talosaga a Pauga, o lona uiga o le a umi ai lava ona faatali le iloiloina o le mataupu, ma o le a tagatagai i le faaiuga o le tausaga pe a valaau mataupu o talosaga toe iloilo lea e auai mai ai faamasino mai fafo e latou te iloiloina le mataupu.
O le aso 3 o le masina fou o le a toe valaau ai lea mataupu.
