O Susana Lavea o se tina mai le afioaga o Toamua ma Safotu i Savaii, e 37 ona tausaga o loo tuuaia i le maliu ai o lana tama teine 12 tausaga.
I le fofogaina o lenei mataupu i le faamasinoga maualuga, i luma o lana afioga le tamaitai faamasino Niava Mata Tuatagaloa, na poloaina ai e le faamasinoga itu uma e lua ina ia tuuina atu uma faamaumauga o lenei mataupu a o lei aulia le aso 9 o Iuni o le tausaga nei.
O lenei mataupu o loo molia ai le tina o Susana na tulai mai le tausaga ua mavae ina ua mamulu mai ona lima se tasi o ana tama sa faaoolima iai ma tamoe ese, ona ia faaaogaina lea o se maa e togi ai, peitai na lavea ai se tasi o ana tama teine e 12 tausaga.
O lenei mataupu na ta’ua e le sui komesina o leoleo Papalii Monalisa Tia’i Keti, i suesuega leoleo, na atoa lelei le aso e tasi talu ona lavea le teineititi ae faatoa faanatinati ifo i le falemai i Motootua ina ua vili tiga le teineititi i lona ulu, o le falemai foi i Motootua na maliu ai lava.
O loo teena e le tina moliaga a le itu leoleo o le fasioti tagata paivalea.
I le valaauina o lenei mataupu i le amataga nei o le tausaga, na poloaina ai e le afioga Fepuleai Ameperosa Roma le tina ina ia agai e saili se loia e tulai mo ia ae totogi e le polokalamae fesoasoani ale Malo (legal aid).
