E uma loa le aso mālōlō o le lotu a tamaiti i le Aso Gafua 13 o Oketopa, ae Aso Lua 14 o le masina fou lava amata ona tagofia e le faamasinoga o faigāpalota tagi e valu o moliaga o faatosina solitulafono e mafua mai i le faigāpalota tele.
O le Aso Gafua ananafi i Samoa na faailoa mai ai e le faamasinoga le faatulagaga o matāupu ma aso o le a su’esu’eina ai.
O le a talamalae tagi mai itumalo faapalota o Aiga i le Tai o le a tauaveina e le afioga i le Faamasino Sili afioga Satiu Simativa Perese ma le afioga i le Faamasino o le Faamasinoga Maualuga afioga Fepuleai Ameperosa Roma.
O le Aso Lua foi lea o le a su’esu’e ai le tagi mai le itumalo palota o Safata 1 o le a seei ai afioga i faamasino sinia o le Faamasinoga Maualuga afioga Vui Clarence Nelson ma le afioga i le faamasino o lea lava faamasinoga susuga Leiataualesa Darrel Clarke.
O le a tagofia ai foi i le aso muamua o ia su’esu’ega le tagi mai le itumalo palota o Faasaleleaga 2 o le seei ai faamasino o le Faamasinoga Maualuga le afioga Leutele Niavā Mata Tuatagaloa ma le afioga Loau Donald Kerslake.
O ia tagi e tolu o le a faagasolo ona su’esu’e i le vaiaso muamua o galuega a le faamasinoga o faigāpalota, ona sosoo ai lea o tagi ua faatulaga mo le vaiaso lona lua e amata tagofia i le Aso Gafua 20 o Oketopa.
O tagi mai itumalo faapalota o Falealili 1, Vaimauga 2 ma Faasaleleaga 5 o le a su’esu’eina ai i le lona lua o vaiaso, ae taualuga i le vaiaso lona tolu mai le aso 27 o Oketopa o le a su’esu’eina ai tagi mai itumalo faapalota o Falealili 2 ma Faasaleleaga 3.
Ua faailoa mai e le faamasinoga aso o ana galuega mo le tagofia o ia matāupu e faalagolago le tausisia o aso ua faatulaga mo le su’esu’eina o tagi i le vaiaso lona lua ma le vaiaso lona tolu, i le mae’a lelei ona su’esu’e o tagi e tolu o le a amata ai le galuega a le faamasinoga.
E pei ona mae’a ona faalauiloa lautele nisi o moliaga o tagi ua faaulu atu, o tuua’iga o le ave o tupe, taumafa, ma le faamata’u o tagata palota o loo autū iai ia matāupu tau faamasinoga e mafua mai i le faigāpalota tele ua mae’a.
