O se tasi o alo o Samoa e suafa ia Henry Onesemo o se alii kuka ua lomia se faamatalaga e uiga ia te ia i le Seven Sharp i le vaiaso nei.
O loo faamatalaina ai o ia o se alii na soifua ane i Amerika Samoa ma sa agai foi i Amerika ma aofia ai i nisi o faaaliga sa faafiafia ai mo tulisi aemaise i le Disneyworld’s Polynesian Resort.
Peitai o lona toe taliu atu ai i Samoa sa aoaoina ai o se alii kuka ma faimalaga mai ai i Niu Sila nei ma maua ai le avanoa e fesoasoani iai se tasi foi alii kuka o Samoa ma Niu Sila, Michael Meredith ma oo mai ai i le asō ua tatalaina lona lava fale’aiga i le faaitu o Parnell i Aukilani.
O le fale’aiga ua faaigoa Tala e aofia ai taumafataga ua saunia lelei ma taumafa Samoa foi ma faatino ai foi le faiga o le suavai poo le umu e pei lava ona faatino i si o tatou atunuu.
