Ua 15 pine ua maua e Samoa mai lana ‘au masii i taaloga laiti a le Pasefika o loo faagasolo mo le lua vaiaso i le atunuu o le atu Mariana i Matu.

O le po o le Aso Tofi na faailoa mai ai i se pepa o faamatalaga le maua ai e le ‘au a le atunuu o pine auro e fitu, 4 siliva, ma le 4 pine apa memea. O le taaloga siisii u’amea mamafa, veloina o le tao le Javelin ma le taaloga taufetuli selau mita i le vaega o alii ua maua ai uluai pine auro a Samoa, ae o loo faagasolo isi taaloga ma le faaaliga mai a le pulega o le tatou ‘au o le a manumalo ai foi mo nisi pine faaopoopo.

O le tamaitai o Faustina Tupuola Niusila Opeloge ua na faatuina se matati’a fou i le vaega o tamaitai talavou mo atunuu o le Oceania i le siisii u’amea mamafa, i le vaega o le 81 kilokalama. Na manumalo i le sii o le snatch 90 kilokalama, o le clean and jerkb e 108 kilokalama, ma maua ai le aofa’iga e 198 kilokalama. Ua avea le matati’a ua ausia e Faustina ma avanoa ua manumalo ai foi i le pine auro i taaloga a Malo o le Taupulega.

O le alii 16 tausaga le matua o Tovi’o Ah Chong i le taaloga lava o le siisii u’amea mamafa ua na faatuina foi se matati’a fou i le vaega o alii talavou o le Oceania i le mamafa e 81 kilokalama, lea na ia ausia le mamafa e 140 i le sii o le clean and jerk. O le vaiaso fou e toe faagasolo ai nei taaloga seia oo ina mae’a. O le alii o Donny Masele Tuimaseve na ia maua le pine auro i le taaloga o le veloina o le tao e 69 mita le mamao.