Ua tata’e ni matati’a a le Oceania o le siisii uamea mamafa e alo o Samoa lea o loo tausinio i le NZ National Championships i Mt Maunaganui.
O se lipoti lata mai a le Radio NZ na lipotia mai ai o Don Opeloge lea sa pine auro i taaloga a le Commonwealth 2022 e tolu isi matati’a ua ia faatuina.
O Feagaiga Stowers lea na pine siliva i le Commonwealth ua ia faatuina se isi matati’a fou e 158kilo i le clean n jerk.
O John Tafi na manumalo i le itupa o alii e 73kilo ma ua faatuina ai foi se isi matati’a fou i le Oceania juniors.
O Tovio Ah Chong le isi ua faatuina se matati’a i le vaega o alii juniors e 889kilo.
O isi na faamanuiaina e aofia ai Avatu Opeloge na malo i le itupa o tamaitai e 76kilo ae tulaga lua Faustina Opeloge i le vaega na tausinio ai.
O Imosina Pelenato na malo i le itupa o tamaitai talavou e 87kilo ma Lesila Fiapule na malo i le vaega o tamaitai laiti.
O Olevia Selemaia na malo i le vaega o tamaitai e 64kilo.
Fai mai le faiaoga Tuaopepe Jerry Wallwork o se iuga lelei tele o tausinioga a lana autaaalo.
