Ua faatonuina nei se tasi o auaunaga o le bakery i Kalaisetete e toe totogi le toeitiiti 12 afe i se tasi o mataupu e aofia ai se tasi o ana tagata faigaluega.
O le mataupu lea na ave e le tagata faigaluega i le ERA, Employment Relations Authority ona sa ia ta’ua e ogaoga aafiaga ma mafatiaga tau tupe o lenei mataupu ona o le gaoia mai e le fale faigaluega o tupe mai lona totogi.
O le 2018 na amata faigaluega ai Aaron Mitchell i le Breads for Europe ma na mulimuli ane ia iloa ai o loo iai vaega o lona totogi o loo toese e le falefaigaluega e aunoa ma sona malamalama iai.
Sa faatalanoa le mataupu ia Fepuari ma Mati 2020 ma ta’ua ai na sainia e Mitchell se form sa tuuina atu i le Employment Relations Authority e aveese ai tupe mai lona totogi e toe faapaleni ai se ovepayment sa iai.
I suesuega sa faia i le mataupu ua ta’ua ai sa iu ina faaopoopo pea le tupe sa toesea mai le totogi o Mitchell ma iu ai ina le toe foi ane e faigaluega ae saili loa se fesoasoani faaletulafono.
I le mae’a o le mau feutanaiga ua faia mai ai le faaiuga a le ERA e tatau i le Bakery lea ona toe totogi le aofaiga e $8,884.79 ia Mitchell ma le faasalaga e 3 afe tala Niu Sila i le Crown.
Fai mai isi lipoti o loo toe apili e le kamupani lea faaiuga.
