I se lipoti mai le matāgaluega a le soifua mālōlōina, le Health NZ ua ta’ua ai, le maua o nisi o le aufaigaluega a le soifua mālōlōina, o loo latou faaaogā polokalame lē totogia a le AI e pei o le ChatGPT ma le Gemini e fai ai a latou faamaumauga faafoma’i poo clinical notes, ma ua ta’ua i lea lipoti, o se faiga e i’u ai ina faia se a’oa’iga aloa’ia (formal disciplinary action) o se tasi.
Na vaaia e se sui o le RNZ se memo na auina atu i le vaiaso lenei e se tasi o pule sinia i le aufaigaluega uma a le Mental Health and Addiction Services i le itumalo o Rotorua Lakes, o loo toe faamanatu atu ai ia i latou ina ia aua ne’i faaaogāina polokalame nei e pei o le ChatGPT, Claude poo le Gemini i le faiga o a latou faamaumauga ma lipoti.
O loo ta’ua i lena faaaliga, e iai nisi o le aufaigaluega ua latou faaaogā le AI e tapena ai a latou faamaumauga faafoma’i.
O na polokalame a le AI e matuā faasāina ona faaaogā i faamaumauga ma ni matāupu faafoma’i, ona e iai le popolega o le a lē malupuipuia ai faamatalaga, ma matāupu faalilolilo.
Na ta’ua foi i lea faaaliga, e lē faatagaina foi ona faaaogā polokalame a le AI faapea e tau ina faata’ita’i ai le faatulagaina o ni faamaumauga ona tago lea o le tagata ia e toe tusilima pe toe type na faamatalaga, e tusa foi pe e te le’i faailoaina le gasegase o loo faasino iai faamatalaga.
Ma ua faamanatu atu ai i lenei faasilasilaga, e mafai ona faia a’oa’iga aloa’ia i se tagata faigaluega e maua o loo ia solia lenei faatonuga.
O le ta’iala aoao a le HNZ mo le AI, o soo se polokalame a le AI e tatau ona lesitalaina aloa’ia i le Health NZ National Artificial Intelligence and Algorithm Expert.
O se faasilasilaga e lē o taoto lelei i finagalo o nisi, e pei o le failautusi aoao o le asosi a tagata faigaluega, le tama’ita’i o Fleur Fitzsimons, o loo fai ma sui o le to’atele o tagata faigaluega a le soifua mālōlōina, ma ia ta’ua ai, ua ala foi ona sulu le aufaigaluega a le falema’i i polokalame nei a le AI, ona o le tele o galuega ua fetaomi mai mo i latou.
Ta’ua e Fitzsimons, o se faasilasilaga faalaua’itele faapea e faamata’u mai ai se gaioiga o le a faia i se tasi e maua o loo solia, e matuā sesē lena auala o loo momoli mai ai.
O se lapata’iga e atili ai ona fefefe le aufaigaluega e talosaga ma sa’ili atu mo se fesoasoani.
Fai mai a ia, e tatau i le matāgaluega a le soifua mālōlōina a Niu Sila ona inivesi i ni polokalame talafeagai e fai ai a’oa’oga a le aufaigaluega; manatua e le’i mamao tele atu, ua faamuta ai e le matāgaluega i latou sa galulue i polokalame i luga o le initaneti, le digital systems ma IT support.
Afai la o lea ua tapa le aufaigaluega i polokalame nei e lē o totogia, e moomia i le HNZ ona iloilo ma fesili ane pe aiseā, ae lē na o le faamata’u mai o le aufaigaluega i le solia o le Code of Conduct.
Puna o Faamatalaga: https://www.rnz.co.nz/news/national/590645/health-nz-staff-told-to-stop-using-chatgpt-to-write-clinical-notes
