E $34,950 tālā se tupe na aveesea mai se nofoaga i le nuu o Leonē na faatino ai se osofa’iga a leoleo i le masina o Me lea na autū i le sa’ilia o fualaau faasāina.
O se galuega sa faatino i le malosi o se tusi faataga mai le faamasinoga poo se search warrant.
Peita’i o le mae’a iloiloina e le faamasinoga o le finauga a loia mo i latou e to’atolu o loo molia i le mae’a o lea osofa’iga tau fualaau faasāina, ua manino ai o le aveesea o lea tupe e leai se molimau ua tuuina atu e leoleo e faamaonia ai o lea seleni e iai sona sootaga i fualaau faasāina.
Ua faailoa lautele ai se finagalo o le sui komesina o le matāgaluega o leoleo, falepuipui ma le toe fuata’ina le susuga Leiataua Afamasaga Samuelu, ma ia faailoa i le nusipepa o le Samoa Observer, afai o le faai’uga lea a le faamasinoga e ao i leoleo ona usita’ia.
