E toatele paaga a le faletupe a le Westpac na faateia i le siaki atu o paleni o teugatupe i le taeao o le Aso Toonai ua overdraft.
Mai lea taeao e oo mai ananafi e lei mapu le tele o faitioaga i luga o le social media faapea lipoti ona o le lē lelei ona fesootai mai o le faletupe i tagata na aafia.
I faamatalaga mai le faletupe e iai le faaletonu o fesootaiga tau tekonolosi na le toesea ai e le faletupe peimeni na faia i le aso 22 ma le 23 o Tesema ma o lea na le sa’o ai paleni i teugatupe a a tagata na aafia, e ui o lea e ta’ua mai i luga o online banking ua uma ona totogi peitai e lei toesea.
O le faanoanoaga o le toatele na toe lipotia o lea ua lua vaiaso faatoa pisa mai le faletupe, ma o le aveesea ai e aunoa ma se tala e muamua fai mai ua faateia ai nisi ma ua le lava ai ma le faasoa i le faaiuga o le vaiaso aemaise ai peimeni sa fuafua e faaalu ai tupe ua toe aveesea e le faletupe.
I nisi o molimau faamoemoeina a tala fou na aafia ai, o le faigata o le mea na tupu ona o lea sa faailoa mai lava i luga o online banking igoa o faatauga ma tupe na aveesea, ma ua faigata ai ona faamaonia faamatalaga a le faletupe ona e lei mafaufauina e pue ni ata e fai ma molimau o mea sa vaai iai i le lua vaiaso talu ai.
E oo mai i le taeao nei ua sau tala o le a toe faafoi mai e le Westpac le oo atu i le $800 o tupe na aveesea poo overdrafts ma e le o tagata uma na aafia ae e mo na o nisi ma e iai lava taiala e tatau ona uia.
