Na matuā lē logo lelei i le aofia na auai i le faaipoipoga a le alii sa taalo mo le Toa Samoa i le taamilosaga o le Ipu a le lalolagi talu ai nei, o Brian Too, upu o le lauga a lana uosili, le isi foi alii sa ta’uta’ua i lea lava taamilosaga talu ai nei, o Jarome Luai.
O se aso matagofie mo Brian ma lana manamea le tamaitai o Moesha Chrichton-Ropati. I le taimi atoa foi o le sauniga i le falesa, e iai se gaioiga na faatino e Luai i le taimi atoa, e foliga mai na matuā mata’ina i le maimoa atu a tagata.
E masani ai o le tamaitai uosili lava e nafa ma le vaaiga atoa o le tamaitai faaipoipo aemaise le fetuuna’iga o le fele ma le veli o le ofu faaipoipo auā na matauina e telē ma ono faigata mo na o se teine e toatasi ona fetuunai ma tau faatulaga. Ae o iinā sa matauina ai le mataalia o le alii uosili o Luai, auā e lei faamamalu i lona talaga ae sa fesoasoani atu i le teine uosili i le tau faatulagaina lelei o le fele o le ofu o Moesha i le taimi atoa sa fesavalia’i ai luga o le pulelaa.
O le ‘ai lelei lena mo Luai sa amata vaaia i le faagasologa mai o le faaipoipoga. Peitai o le taimi o lana lauga o le alii uosili, na tulai mai ai le matuā faate’ia o le aofia uma na auai, ina ua faagasolo le lauga ae sau ai ni faamatalaga matagā a o ia tau faamatala le la mafutaga ma Brian. O mea na ia faamatala ma le gagana na faaaogā sa matuā lē talafeagai ma lē mafaufau.
I le olaga faatama talavou o aso faisoo, atonu o le gagana masani lea o loo gagana ai, peitai o le taimi ma le nofoaga sa faia ai, ua matuā sese i sini i le mafaufau o soo se tagata soifua ua aoaoina lelei, i tu ma aga aemaise lava i le aganuu a Samoa.
E tele lafoga ma upu o le tiga ma le ita na lalafo e tagata i luga o le facebook, ua toetoe ai lava galo uma le faaeaea ma le mitamita o le atunuu sa iai mo lenei alo o Samoa a o ia faatino i se tulaga maualuga le taaloga na se’i faatoa mavae atu nei, ae ua matuā sa’i tagata ma faailoa le maofa tele ona o le mafai e se atalii o Samoa ona fai mai nei ituaiga faamatalaga a o faafofoga le aofia mamalu, aemaise o se aso sa auai le toatele o tino matutua, o faafeagaiga ma faletua, o tamā ma tina matutua, tainane le loaloa o talavou sa matuā lologo a o tulai Luai e fai lana lauga.
Na fefifoi foi lagona sa faaalia. E toatele na feita ma inoino i le gagana a Luai na faaleo, peitai na iai foi nisi sa taumafai e tilotilo mai le isi itu ma faamanatu i tagata, se mea lelei foi na faatino e lenei atalii i le finauina o se ‘ai mo Samoa i taaloga na mavae atu; na ta’ua ai foi e leai lava se tagata e sa’o atoatoa, ma atonu o le agaga o le alii uosili ia faamatala le ituaiga o olaga vavalalata sa iai i laua ma lana uo, le alii faaipoipo i aso faisoo, peitai ua misi ia Luai, e ese le nofoaga ma le faatasiga lea e tulai ai luma.
Peitai o le aso ananafi, na faalauaitele mai ai i luga o le fb se tusitusiga mai le alii o Jarome Luai, o lana faatoesega i lona agaga matamuli ma ua matuā salamō i se tu ma se aga na ia fai.
Na faatoese ma ia ta’ua lona maasiasi ma le faanoanoa i le sese o lana gaioiga na fai i le aso faapitoa o si ana uo, le alii o Brian, aemaise o lona faalumaina ai o aiga e lua faapea foi ma lona lava aiga.
Fai mai Luai, ua leai se mea e mafai ona ia toe aveese ai ana upu na fai, peitai o le mea sili lenei ua ia faia, o le vave ona toe faatoese ma faamaulalo mai ia i latou uma ua afaina finagalo i sana tu ma sana tala ua lē tau tamalii.
