Na vave ona toe agai mai faatonu o le Komiti Faafoe o le Miss Samoa Queensland e momoli mai le faatoesega ma faamālūlū i le atunuu ona o se faaletonu na sese ai ona faalauiloa mai nisi o faailoga o tamaitai sa tauva i le sailia o se Tausala poo se Miss Samoa Queensland auā le auai atu i Samoa ia Setema mo le sailiga o se Miss Samoa.
O le sasi e pei ona saunoa le Faatonu, le afioga ia Lealaitagomoa Fuimaono Silia Anae Uta’i, na sese ona faalau mai luga i laua na manumalo i vaega o le Best Puletasi ma le Best Interview e pei ona feseta’i ai tamaitai na ave iai faailoga mo nei vaega o le tauvaga.
O le fesea’iga na tupu i le Best Puletasi na faasilasila mai e maua e le tamaitai tauva #2 peitai e tatau ona maua e le tamaitai tauva #3 ae o le Best Interview na faasilasila mai e maua e le tamaitai tauva #3 peitai e tatau ona maua e le tamaitai tauva #2.
Na saunoa Lealaitagomoa, e ui i nei fesea’iga ae lē o aafia ai le faaiuga a faamasino i le iuga aoao o le tauvaga, o loo tumau pea le manumalo i le tamaitai tauva #3, Sootuli Ausage Pepe.
O le Aso Toonai talu ai, na faataunuu ai lenei tauvaga tausala i Kiuniselani ma e toafā tamaitai na tauvaina le pale o le Miss Samoa Queensland 2024-2025.
