O le toe aliali mai o vevesi i le va o nisi o fanau aoga mai ni kolisi i le taulaga i le vaiaso na tea nei, ua faailoa ai e le Komiti Faatonu o le Kolisi o Sagato Iosefo i Alafua, e faapea sa iai ma nisi o tama aoga o le latou kolisi i ia vevesi.
I se pepa o faamatalaga mai le Pulega o le Kolisi o Sagato Iosefo ma le Komiti Faatonu, ua faapea mai ai, o le mea moni ua lagona le maasiasi ona ua ta’uleagaina le igoa o le aoga.
Ua ave ai le faamaulaloga a le kolisi ma momoli vaimalu i puega ona o amio le taupulea ua faatino e nisi o le fanau a le kolisi i nofoaga faitele ua afaina ma faamanualia ai nisi.
Ua faailoa ai foi o loo faagasolo pea suesuega i le mafuaaga o le vevesi ma e na aafia ai, ae e le toe talia soo se tama aoga e faamaonia le faatupu vevesi i nofoaga faitele.
Ua tautino ai le komiti faatonu ma le pulega a Sagato Iosefo o le sese o nisi o fanau a le kolisi, o le sasi foi lea o le pulega ma le fono faatonu o loo taitaifono ai se tasi o tama tuai le alii loia le afioga Aumua Ming Leung Wai.
Ua fautuaina matua o fanau a le kolisi e manaomia le latou lagolagosua i le ave o fautuaga ma upu timai i alo ma fanau ina ia tausia ai le nonofo filemu ma le fealofani o fanau a le atunuu o loo aoaoina i totonu o kolisi ma aoga maualuluga i le atunuu.
Mo le silafia o le toe tulai mai o ia vevesi e le o alo tamala ai le auaunaga a leoleo i le mataituina o ia tulaga ma molia foi fanau e tusa o ala o le tulafono.
E le o se taimi muamua lea ua tulai mai ai ia tulaga, aua o ni tausaga ua mavae sa vevesi ai foi nisi o fanau mai nisi o kolisi tu taulaga, sa faia foi iai le galuega a leoleo ma e iai nisi o ia fanau ua faamaonia a latou solitulafono i le faamasinoga ma ua faia foi iai faasalaga.
