Ua faailoa manino  le finagalo o le afioga ia Galumalemana Rudolf Moors i luga o le faatalatalanoaga ma Leiataua Savea, i le polokalame o le Gagaifo o Faiva a le Radio Samoa e faapea, se’iloga lava e o ese tagata ia e faaletonu ai le iuni lakapi faato’ā toe fia apalai i se avanoa i totonu o le iuni. 

Ua mafua ona sa’i lagona ma faailoa atugaluga o lea tamalii a o tautua ai i totonu o le iuni lakapi a Samoa, ona o se faai’uga lē fetaui a le iuni ua faamālōlō ai o ia a o avea ai ma faia’oga o le Under 20 a Samoa. 

O Galumalemana Rudolf Moors o se tama tuai a le Manu Samoa ae na avea talu ai nei ma faiaoga a le Under 20. 

Sa amata galue mai i le iuni lakapi a Samoa i le tausaga e 2000 seia oo mai i le 2020 o se tagata o le ofisa e galue i le atina’eina o le lakapi a le atunuu, ma o ia foi tausaga sa galue o se probation officer e leai se konekarate e sainia. 

O le tausaga 2020 na faailoa ai le faasalalauina o le avanoa o le faiaoga o le Under 20, ma sa apalai ai loa le afioga ia Galumalemana ma ia mauaina le avanoa ae amata i le tausaga 2021 ae uma i le 2022 ma e lua tausaga o le konekalake.

O Fepuali i le tausaga 2023 na toe logoina ai e le pulega a le iuni lakapi le afioga ia Galumalemana e toe faaauau lana konekalake ma le faamoemoe e iai se taimi o le tausaga ona saini lea o le konekalake, o nei fuafuaga uma sa fai gutu uma lava.

Sa lagona lava le fiafia o lea tamalii ona o lea ua maua atu le tala e toe faaauau lana tautua, sa ia faatino le tele o ana polokalame e ono fesoasoani ai i le iuni lakapi aemaise o le ‘au a le atunuu le Under 20.

O le aso 16 o Setema i le tausaga 2023 na toe aami mai ai e le Iuni lakapi le afioga ia Galumalemana ma faailoa ane ai ua faamālōlō o ia e le iuni lakapi.

Na lagona le lē fiafia o lea tamalii ma ia fesiligia ai poo ai na faamālōlōina o ia, ae tali mai le pulega o le faai’uga mai le komiti faafoe

E tele vaega na tuufesili ai Galumalemana i le iuni lakapi e ala i lana konekalate e lei sainia aemaise ai o auala e faagasolo ai le faatinoina o galuega a le iuni lakapi.

A iai se mea e faaletonu ai faiaoga e tatau ona fe’au atu ma faatalanoa i ni mea o loo faaletonu. 

Na maua lelei e le afioga ia Galumalemana Rudolf Moors le pepelo o le pulega a le iuni lakapi ina ua ia fesiligia nisi o sui o le komiti faafoe le afioga ia Fuimaono Titimaea Tafua ma le afioga ia Leaana Ronnie Posini pe aisea ua faamālōlō ai ia ma le iuni lakapi?

Ae toe fesili mai le komiti faafoe poo ai na faamālōlōina ia?

Tali Galumelamana o Faleomavaega Vincent Fepuleai ma Seumanu Douglas Ngau Chun.

O saunoaga a nei sui o le komiti faafoe e faapea e leai se faai’uga faapena a le komiti faafoe, pau le tala sa fai, o le isi fonotaga a le komiti o le a fe’au atu ai oe ma le pulega tou te o mai e fai se tala.  

O le faamālōlō ai o le afioga ia Galumalemana i lana galuega, o se mea ua lagona ai le lē fiafia o lea tamalii ona o le faamuta faafuasei o lana galuega.

Ae ua tele ai le aafiaga i lona aiga i mea tau tupe aemaise ai o aoga a si ana fanau.

Ua ova ma le 23 tausaga talu ona tautua Galumalemana Rudolf Moors i le iuni lakapi i lana tautua matavela e leai se faalogologo tiga ae sa fai ma le fiafia mea uma ona o le manatu ia manuia le ‘au o le Under 20 a le atunuu auā le Manu Samoa.

O le tula’i mai o lea faafitauli i lea faia’oga a le Under 20 ua tuuina atu ai lana mataupu i le faamasinoga mo se lavea’i aemaise ai se’i faamanino ma faailoa mai le amiotonu o loo aga’i iai le faaletonu a le iuni lakapi a Samoa ma a latou faai’uga fai.