Ua mae’a le la’uina ane i tane i le uafu i Apia o le vaega muamua o suāuu mai le manuao o le Manawanui, ma o lea ua faailoa i se pepa o faasalalauga ua amata le vaega lona lua o le galuega e faaauau ai lava ona aveesea suāuu mai lea manuao.
Faaalia e le sui o le vaega o le fitafita o le puipuiga a Niu Sila o Commodore Andrew Brown, o se tulaga faafiafiaina le faagasologa o le galuega e ui ina feagai ma lu’itau i le faaletonu o uiga o le tau i nisi o taimi.
O su’esu’ega o loo faia i le suāsami ma figota i le vaega o loo goto ai le manuao, o se tasi lea o galuega o loo lagolago atu ai i le nofoaga o su’esu’ega faasaienisi a Samoa o loo faatinoina lea galuega.
O le vaiaso na te’a nei na faailoa ai le faaitiitia o ogasami o loo tapu mai le uia e tagata fagogota ae o loo faatumau pea le sā ona fagotaina ogasami o nuu o le atu Safata o loo aafia i le galuega aemaise le tu lalata i le vaega o loo goto ai le manuao o le Manawanui.
Ua savalia nei le 3 masina talu mai Oketopa o le tausaga na te’a nei na tula’i mai ai le faalavelave na pa’ulia ai lea manuao, sosoo ai ma le mu, ae taualuga i le goto uga.
