O loo faagasolo pea faalauiloa a itumalo a le atunuu e ala lea ia latou fua o faaeleeleaga ma o le asō lea ua oo ai i le Itumalo Falealili 1.
O le Minisita o Faatoaga ma Faigafaiva, Afioga Laaulialemalietoa Polataivao Fosi Schmidt na saunoa ai i lenei faamoemoe.
“O fuafuaga faataatitia alualumamao a la tatou faigamalo ma o lana manulauti e tasi lava lona fatu atoa se’i o tatou tilotilo i mea o tutupu i lenei vaitau o lo tatou olaga.
“Ua tele suiga ogaoga e le gata i suiga o le tau a o eseesega o soifuaga sa tatou ola ma soifua mai ai o faama’i ma faafitauli ua le mafaitaulia.
“Ua tele ina siitia le suauu siitia atu ai ma le gaosiga o oloa ma ua tatau ia Samoa ona fai se fuafuaga.
“E le mafai ona tatou toe faalagolago i oloa mai fafo auā na o lo tatou tigaina ma oi lava e maua mai ai.
“O se tala faataitai, o le taimi lenei o lea tatou te taumamafa i aano o le moa mai Amerika a o nei moa pe fitu i le valu masina faatoa oo mai ia tatou e le i lalo ifo o le 60 -70 container 40 futu ile masina.
“A tuu i le tala lata mai e 6-7 miliona moa atoatoa lea tatou te taumamafa ai i le tausaga atoa.”
O le siiga o tau o felauaiga o oloa na ta’ua ai e le Minisita o lea lava ua maitauina i le tau o nei oloa ua siitia mai i se tau itiiti i se tau tele.
“Ma o nei siitiaga e le mafai ona tatou taofiaina e pule lava i latou o loo malolosi i tau o a latou oloa, o le tau foi o le soifuaga e le toe alu i lalo.
“Ae o le faamoemoe o le tatou Malo, ia tatou faia ni suiga e māmā ai avega, o ia suiga Falealili, toe tilotilo lava tatou ia tatou.”
Na ia faasoa foi o loo iai le popolega tele i Malo Aufaatasi i le taimi nei ina ne’i sau se aso ae iai se oge i le lalolagi.
“O loo iai atunuu e fia selau afe tagata o loo fano i le fiaaai, fiainu, fia maua se nofoaga e nonofo ai, o faafitauli ia e le mafai ona tatou foia.”
E na o le lua tauvaga sa mafai ona faatinoina i le atunuu i tausaga ua mavae, sa fatino lea mo Upolu ma le motu tele i Salafai.
“O le mea sa tupu ai i nei tauvaga, e lei tofutofusia uma le atunuu i faamanuiaga auā e iai le aumalolosi e iai taavale e tu atu lava alu i Apia ma Salelologa, ae faafefea le lautele o le itumalo.
“O le ala lea na suia ai le fuafuaga lenei o le a fai uluai seleselega, fua o faaeleeleaga mai le tausaga i le isi tausaga e tatou te omai ai e fai le lotu faafetai i le Atua mo mea ua tatou maua.
“Ma o le tupe atoa e $500,000 sa faaagaga mo tauvaga nei e lua, lea ua vaevae lelei tofu lava le gogo ma sina i’a.”
O le faamanuiaga ua faamatuuina nei mo le itumalo e $10,000 lea ua maau ai le Minisita ma le Matagaluega e ala i meafaigaluega e faaaoga e galueina ai le eleele faatasi ai ma laau totō auā faatoaga ma mea totō.
