A o faasolo ai fonotaga laiti i lenei vaiaso, o loo maitauina foi le faatino o le tele o polokalame eseese e faamanatu ai le tāua o le tele o mataupu o loo talanoaina i le Fono a Malo o le Taupulega. 

O le asosi o tusiata i le atunuu o le Vaosā ua mafai ona galulue faatasi ma sui o tagata tusi ata aemaise o fanau ua iai le taleni e faatino so latou faaaliga ua faaautūina o le Paradise at Risk; e ala mai le lagolago a le Matagaluega o Tina ma Tamaitai, Atina’e o Afio’aga ma Agafesootai. 

O nisi o tupulaga talavou na faasoa ia latou ata na tusia, e pei ona faamatalaina e le tamaitai ia Paese Paletāsala se tasi o ana ata e faatatau i faafitauli o loo feagai ma Samoa, le Pasefika ma le Taupulega o se faafitauli ua laualuga foi i mataupu i le faamasinoga, e pei ona iai sauāga matagā ua faia faasaga i fanau teine ma tamaitai.

O le tamaitai ia Siufaga Maria Kerslake na ia faasoa i ana ata, o loo au’ili’ili ai laufanua ma eleele ma le moana sausau ma le vanimonimo o sootaga ma atunuu taitasi. 

Na faasoa le alii o Lalovai Peseta i le atoaga o lenei polokalame ma le auai ai i tapenaga o lenei fonotaga tele.

Na ta’ua e Lalovai lona agaga faafetai i le Matagaluega o Tina ma Tamaita’i, Atina’e o Afio’aga ma Agafesootai i le tali atu ia latou talosaga mo se faaaliga, ma ua maua ai se fesoasoani ae o le avanoa e faaali ai taleni ma agavaa o fanau e ala ia latou ata tusia. 

Na faamatalatala ai foi e le alii tusiata lauiloa le uiga i lona tusia o le ata a fanau a lana fanau; ma na ia faaalia ua ia faaautūina le ata na ia tusia, “E lē mautinoa taeao”, faamatalatala e le alii o Lalovai o lea ata ua ia faatusatusaina lea i le tele o faafitauli o loo tula’i mai nei i Samoa, ma o le naunauta’iga o le taumafai lea e faaali le telē o le sao o aiga i le poupou ma le puipuia o fanau ma tupulaga lalovaoa o le atunuu, ina ia maua e fanau se lumanai saogalemu, ma le saoloto.

E to’a 22 fanau tusiata mai le Asosi o Tusiata a Samoa le Vaosā ma nisi sui e to’alua na faaopoopo atu i le numera o i latou na auai i lea faaaliga.