Ua sauni le alii loia le susuga Quentin Sauaga e tuuina atu lana talosaga i le faamasinoga e faamuta ai ona ia tauave le itu a le susuga Malele Atofu Paulo, ina ua talia e le faamasino sinia le afioga Vui Clarence Nelson, le manao o Malele e sui lana loia e finauina sona faasalaga i lona moliaga ua faamaonia o le taupulepule e faaoo le maliu i lē sa avea ma Palemia.

O le moliaga foi lea e pei ona silafia ua faamaonia faasaga ia Lema’i Faioso Sione.

O le Aso Faraile na tea nei ina ua toe valaau le mataupu lenei mo le tuuina atu o finauga faaiu a loia mo se faasalaga, na tulai ai Malele ma faailoa i le faamasinoga o ia ua manao e sui lana loia.

O se gaioiga na faaalia ai e le loia le susuga Quentin Sauaga e faate’ia tele ai o ia, ona o le Aso Tofi a o lumanai le valaauga o le mataupu i le Aso Faraile sa la talanoa ma Malele ae sa ia lei faailoaina atu se tulaga ua manao e sui se isi ana loia.

Ua faailoa ai e le loia ina ua fesiligia, o Tesema o le tausaga ua mavae na ia amata tapena ai le finauga mo Malele ma sa ave iai ma le logo e tatau ona totogi muamua se vaegatupe o lana auaunaga poo se deposit, peitai na faailoa atu e lē ua molia e le o mafai ona ia maua se seleni i lea taimi ae o le a iai se taimi.

E ui i lea vala ae na faaalia e le loia, sa naunau pea e ofoina lana galuega mo se tasi o loo manaomia le fesoasoani ae tālia ai se taimi e faatino ai tulaga masani i le totogi o lana auaunaga.

Peitai ua lē o se tulaga lelei ua aliali mai. I le fā masina o mafuta lē ua molia ma le loia e leai se tupe ua ia totogia.

Ua tuu avanoa nei le faamasinoga ia Malele e saili ai se isi ana loia, ae o le isi valaauga o le mataupu o le a finauina ai le talosaga a le loia a Lema’i Faioso Sione o le faataatia o le lauina o se faasalaga, se’i suesue muamua le talosaga apili a Lema’i ua finauina ai le faaiuga a le laulau o faatonu ua faamaonia ai le moliaga.