O le vaega mo fonotaga tetele i le maota o Tui Atua Tupua Tamasese Efi i Sogi o le nofoaga lea o le a faatino ai le sauniga o le faatautoga o sui filifilia e to’atolu mo le tofiga Sui o le Fono a Sui Tofia poo le Sui Ao.
O le 11 o le taeao o le Aso Lua o lenei vaiaso e faia ai lea sauniga mamalu ma le taualoa o le a faatauto ai e le afioga i le Faamasino Sili, Afioga Satiu Simativa Perese le afioga i le Tamaaiga, Afioga Tui Atua Tupua Tamasese Efi, o le Susuga Malietoa Faamausili Moli Malietoa, ma le afioga Le Laulu Tiatia Mapesone Mapuilesua.
O Malietoa Moli II o le alo o le susuga Malietoa Tanumafili II sa avea ma Ao o le Malo, o le afioga Tui Atua Tupua Tamasese Efi sa avea ma Ao o le Malo mo le lua nofoaiga ta’i lima tausaga ae o lona tuaa tamā o le afioga i le Tamaaiga Tupua Tamasese Meaole sa avea ma Ao Soofaatasi o le Malo faatasi ma le susuga Malietoa Tanumafili II ina ua maua le malo Tuto’atasi o Samoa i le tuana’i o pulega faakolone.
O le afioga Le Laulu Tiatia o se tamālii o lona tuaa tamā le afioga Mapuilesua Malo sa avea ma sui Faipule o le Palemene mo le itumalo o Palauli le Falefa i le tausaga e 1967.
O le masina amata o le tausaga fou lenei e amata aloa’ia ai tofiga Sui o le Fono a Sui Tofia o i latou e to’atolu, ae o le faai’uga o le masina na te’a nei o Tesema na mae’a ai le tofiga Sui Tofia o le Afioga Le Mamea Ropati Mualia.
E leai se taimi faatapulaa o aiaia faaletulafono mo le tofiga Sui o le Fono a Sui Tofia.
