E toaono isi minisita fou ua faatautoina i le fale o le malo i le asō ina ua mae’a fetuunaiga ua faia i le Kapeneta.
Ua filifilia foi ma le under-secretary mo le palemene, Jo Luxton ina ua faalauiloa fetuunaiga o le Kapeneta i le aso ananafi.
O i latou la ua faatautoina i le asō e aofia ai Ginny Andersen, Barbara Edmonds, Duncan Webb, Willow Jean Prime, Rino Tirikatene ma Deborah Russell.
E le o toe po se lilo o le aso ananafi na faasee ese ai le afioga Aupito Willam Sio le faipule o Magele mai ona tofi minisita faapea foi ma Poto Williams.
Faailoa foi le agaga faafetai o le toatele o tagata Pasefika aemaise foi tagatanuu o Samoa i luga o upega tafailagi i le sao o le afioga Aupito faapea foi Poto Williams a o tautua ai i le malo o Niu SIla e ala i tofiga faaminisita.
