O le asō lea na faatauto ai le toa sefululima o i latou ua faamanuiaina e galulue mo le leoleoina o ē o loo nofosala i le toese.

Ina ua mae’a vaiaso e 7 o aoaoga, e toaono tamaitai ma le toaiva o alii ua saofia mai mo lenei galuega.

O lenei faatautoga sa faia lea i luma o le Faamasino a le Faamasinoga Faaitumalo, Loau Donald Kerslake na ia toe faapupula ia i latou ua faatauto le tāua tele o lenei matafaioi.

 “O la outou tiute tauave o le mataituina lea o le saogalemu o i latou o loo tulia faasalaga i le toese ae le gata i lea o le saogalemu lautele o le mamalu o le atunuu mai ia i latou o loo nofosala i le toese.”

Na ia toe faamanatu le tāua foi o le tautinoga ua faatinoina e i latou ua faamanuiaina.

“E te tauto i luma o le faamasinoga e te galue ma le faamaoni ma le aloaia e tusa ai ma tulafono o le galuega a le Matagaluega ma e ao ina galulue faatasi ma ia usitaia o outou taitai.”

O se taimi muamua lenei ua faatautaia ese ai lenei aoaoga mai i aoaoga o i latou o loo aoaoina mo tiute o Malu o le Malo ma o i latou muamua ia ua faatautoina i le Faamasinoga Faaitumalo.

O i latou nei e sefululima o le a faia lo latou faauuga i le aso 17 o Me o le tausaga nei i le nofoaga a le Samoa Culture and Art Center i Malifa.