Ua faataunuuina le faatautoga o le Palemia ua iai nei o Niu Sila, Hon Chris Hipkins e pei ona faasalalauina tuusao i le televise lea sauniga.
Vaaia le mamalu o le atunuu ua faailoa lo latou faaaloalo mo le tamaitai sa avea ma Palemia o le atunuu, Jacinda Ardern ina ua agai ese mai ma le Palemene ma lana paaga o Clarke Gayford ma le Sui Palemia o Grant Robertson.
Na vaaia loimata maligi o le toatele na auai ina ua feiloai atu i le tamaitai sa avea ma Palemia ma faafetaia lona sao i le taitaiina o le atunuu mai tausaga ua tuanai.
O Chris Hipkins la lea ua avea nei ma Palemia lona 41 o Niu Sila ma ua 44 nei tausaga o lona soifua ma o loo avea foi ma minisita o aoaoga ma leoleo ae sa avea foi ma minisita sa feagai ma le tali atu a le atunuu i le faamai Koviti-19.
Na faatauto ai foi ma le tamaitai o Carmel Sepuloni o le Sui Palemia o Niu Sila, faatautaia le faatautoga e le kovana aoao o Niu Sila, Dame Cindy Kiro.
O le saunoaga faaiu a Ardern a o avea ma Palemia sa faia i le aso ananafi i Rtana lea sa ia ta’ua ai le alofa ma le agalelei o tagata Niu Sila e ui i nisi o lipoti na agiga i lenei vaiaso i le tele o le mau faamata’u ma isi tulaga lē manuia sa agai ia Ardern a o avea o ia ma taitai o Aotearoa.
