E toatolu faamasino mai Niu Sila ua malolo litaea ma le tasi o faamasino tamaitai o le Faamasinoga Sili a Samoa ua seei nei e tagofia le toe iloiloina o nisi o faaiuga a le faamasinoga maualuga ua toe apili.
O se tasi o faamasino mai Niu Sila le afioga Justice Sir William Young o le taimi muamua lenei ua galue ai i le faamasinoga o talosaga apili a le faamasinoga sili a le atunuu, sa faatauto e le afioga i le Sui o le Fono a Sui Tofia le afioga Le Mamea Ropati, a o lei amatalia galuega a lea faamasinoga i le amataga o lenei vaiaso.
I le saunoaga a le afioga i le Faamasino Sili afioga Satiu Simativa Perese, na ia faailoa ai o le alii faamasino ua faatauto mo galuega a le faamasinoga apili e iai ona sootaga i Samoa, ona o se tasi o lona aiga sa avea ma sui Faamasino sili o le faamasinoga a le atunuu i taimi o pulega a Niu Sila i Samoa i tausaga e tele ua mavae.
O Justice Sir William Young, o le a avea ma sui Peresetene o le Faamasinoga o talosaga toe iloilo a lo tatou atunuu. O galuega a le faamasinoga o talosaga apili o loo faatulaga e sefulu aso e faagasolo ai ma le faamoemoe e tatau ona mae’a i le vaiaso asau.
O le Aso Lua o lenei vaiaso ua suesueina ai le faaiuga i le mataupu a Kolani Lam o loo tuli lona faasalaga soloatoa i le solitulafono o le faaoo o le maliu.
