I le 19 tausaga talu ona faavae le faalapotopotoga tuma’oti o le Toomaga mo ē Puapuagatia ma faagasolo ana polokalame o le puipuia o fanauiti mai sauaga ma faatino foi lana auaunaga o le unaia o polokalame faalauiloa e a’oa’oina ai mafaufau o tagata e taofi soo se sauaga, o lea ua ausia e le faalapotopotoga se isi matati’a i ana galuega fai, o le iai lea o se tagata e avea ma Amepasa mo fanauiti.
O se tofiga ua tulai mai ai se tasi o tamalii o le atunuu e faamautu i Aukilani i Niu Sila o se faifeau foi i le ekalesia Agelikana le Anglican Church, le afioga Toleafoa Lotumaalii Reverend Father, Leatuao Larry Tupa’i Lavea.
Se talanaoaga ma le afioga Toleafoa Lotumaalii Reverend Father Leatuao Larry Tupai Lavea.
O le Faamasino sinia o le Faamasinoga Maualuga, le afioga Vui Clarence Nelson na ia faatino le sauniga o le faatautoga o le Amepasa mo fanauiti i se sauniga i le potu faamasino o le faamasinoga sili a le atunuu.
Faaalia e le Toomaga mo ē Puapuagatia i se pepa o faasalalauga faalauaitele, ua talafeagai tomai ma faailoga ua umia e Toleafoa ma agavaa o loo manaomia mo se tasi na te tauaveina lea auaunaga e pei ona aofia ai ma le faatāua o aiātatau o fanauiti.
