Ua sauni le aufaipese ma le faaili lauiloa a le Punialavaa e masii e faafiafia le mamalu o le atunuu o alala ma papao i le motu tele i Salafai, o se faaopoopoga lea i le latou malaga mai i Samoa e faafiafia i le atoaga o le onosefulu tausaga o le Tutoatasi.
Ua faamaonia mai le faia o le isi koneseti a le Punialavaa i le hall a le kolisi maualuga o le Don Bosco i Salelologa ma o le afiafi o le Aso Lulu o le vaiaso nei lea faafiafiaga.
Ua faailoa e se sui o le aufaipese o le a maimoa fua foi le atunuu i le latou koneseti e leai se totogi, e pei ona sa maimoa fua foi le atunuu i Upolu i le isi a latou faafiafiaga sa faia i le Matagialalua Friendship Park i le eleele fou, lea na matua tumu saisai i le motu o tagata sa maimoaina.
O le masii atu i Savaii o le susuga i le faafeagaiga ia Lale Peteru ma le faletua ia Vini ma o la alo aemaise o le aufaaili atoa mo se isi koneseti e maimoaina e leai se totogi, o se faatāua ma se amanaia lea o le tatou atunuu o alala ma faamautu i Puleono i Salafai.
O se avanoa tāua foi mo le tatou atunuu i Puleono e maimoa ma feiloai atu ai foi i le Punialavaa, a o lei toe tuua Samoa mo Niu Sila.
