Ua faatāua e alo ma tamafanau a Samoa ua filifilia e taaalo i le aulakapi Liki o le Toa Samoa mo le Ipu o le lalolagi i le masina fou, le avea ma avefu’a mo le igoa o le tatou atunuu, ae ua lē o le taui tupe, e pei ona tetele faamanuiaga e maua e tama o loo taaalo i le lakapi liki i le lalolagi.

Na faailoa e le Peresetene o le Pulega o le Lakapi liki a Samoa lona faafetaia o ia alo o le atunuu, a o sauni e malaga i Peretania mo le taamilosaga o le Ipu o le lalolagi o le a feiloai ai ma nisi o aulakapi liki iloga ma malolosi.

O le toavalu o tama ua fili i le Toa Samoa o loo taaalo i ‘au a kalapu lakapi Liki a Ausetalia, o le a auai i le sailiga siamupini o le taamilosaga a Ausetalia e faia i le Aso Sa o lumanai nei, a o lei faatasi atu i le ‘au atoa mo le Ipu o le lalolagi.

O le Peresetene foi o le Lakapi Liki a Samoa le afioga Tagaloa Su’a Faafouina, sa ia faailoa le ‘au filifilia a le Toa Samoa mo le Ipu o le Lalolagi i le masina fou o Oketopa.

Le Peresetene o le pulega o le taaloga lakapi liki i Samoa le afioga Tagaloa Su’a Faafouina Su’a. O le aso 15 o Oketopa le taaloga muamua a le Toa Samoa i le Ipu o le lalolagi, o le a fetaui ai ma le ‘au malosi a Egelani.