O le uluai taimi lenei ua aofia ai tupulaga talavou i le aumalaga a Samoa mo le fonotaga tele a Malo Aufaatasi le COP28 o loo faagasolo nei i Dubai.
I ripoti mai le Ofisa o Polokalame faalesiosiomaga a le Pasefika le Secretariat of the Pacific Regional Environmental Programme (S.P.R.E.P.), o lenei faiga o se manatu i le tausaga o lumanai ina ia mautinoa e tulai mai augatupulaga o loo iai le agavaa e nafa ai ma taumafaiga ina ia saogalemu mai i suiga eseese o le tau.
O i latou e aofia ai se inisinia, tomai tau faafiafiaga, o se faufautua e unaia le leo o tupulaga i mataupu tau suiga o le tau ma se sui faufautua a tupulaga talavou.
Faailoa e le Minisita o le Siosiomaga o le aofia ai o tupulaga talavou i lenei aumalaga o se tasi o vaega o taumafaiga a le Malo ina ia amanaia le sao ma le leo o tupulaga talavou ona o latou ia o le lumanai o atunuu a le Pasefika.
“E moomia le iai o le leo o tupulaga talavou e mafai ai ona matou malamalama i mataupu ma popolega o loo nonofo ma latou, ia unaia latou e auai i vaega eseese o a tatou galuega o loo faatino nei.
“E lē gata i fonotaga faapenei ae o le siosiomaga o loo ola ai.”
O se tasi o sui talavou o Suluafi Brianna Fruean, ua iloga foi lana tautua e ala i le faufautua ma faailo le sao o tupulaga talavou o le Pasefika e ala i mataupu tau i le suiga o le tau, na ia faamalosia ai le galulue punouai pea o atunuu e tusa ai ma nisi o vaega tāua o loo taumafai iai.
“O le naunau e faatino se mea e ese ma le faigata ae ese lo tatou fiu gofie ma faapea o le taunuuga lea e lē o mafai ona ausia se faamoemoega.”
O loo faagasolo pea taualumaga o le fonotaga lenei seia faamae’a i le aso 12 o le masina nei.
