O le asia ai e le Ao Mamalu o le Malo o Samoa o Niu Sila, na faailoa ai le fiafiaga tele o le tamaitai Kovana Sili Rt Hon. Dame Cindy Kiro ina ua mafai ona ia talimalo ai i lana afioga.

I sana folasaga i le faatasiga na saunia ma tapenaina mo le Ao Mamalu o le Malo, na ia ta’ua ai o le faataunuuina ai o lea faatasiga o se vaega e patipatia ma faamausalī ai sootaga valelei o Niu Sila ma Samoa.

Na folasia foi e le Kovana Sili, lona faafetaia o le afioga i le Ao Mamalu o le Malo ia Tuimalealiifano ma lana masiofo, mo le avanoa na tuuina atu ia te ia ma lona alii ia Richard e asia ai Samoa i le tausaga e 2022. 

I le saunoaga a le afioga i le Kovana Sili, Rt. Hon Dame Cindy Kiro na ia ta’ua ai le vavalalata o sootaga ma le mafutaga o atunuu e lua, aemaise o ni atunuu Pasefika e felata’i faanaunauga ma sini autu o le malupuipuia o ona tagatanuu, ae faapea le atina’e o atunuu. 

O lea faigapaaga ma le mafutaga, na faaopoopo le Kovana, o se itu na matua’i faamanino ma faamausalī le pine faamau o faigapaaga 2024 (2024 Statement of Partnership) e pei ona iai anavatau e lima seia oo atu i le 2028; faigapaaga, malupuipuia o tagatanuu, ia maua’a gaioiga e faamalosi‘au i nuu, faausia ni auala ma taiala e fesoasoani atu ai i suiga ma’ale’ale o le tau, ma saga faatupula’ia itu tau atina’e i soo se vaega.  

Na faaalia e Dame Cindy, o loo mafuli lava le fesoasoani a Niu Sila ma ave lo latou faamuamua i itu tau aoaoga, soifua maloloina, avanoa faasikolasipi, atina’e tau tagata tafafao maimoa poo turisi, o fesoasoani i faalapotopotoga tuma’oti ma le tamaoaiga o atunuu. 

Na faaalia e le tamaitai Kovana Sili, o le a ia tulimata’ia pea galuega fai mo sootaga a Niu Sila ma Samoa. 

I le auai mai o le asiasiga a le afioga ia Tuimalealiifano ma le Masiofo na faatino ai ni sauniga faalemalo e faafeiloai atu ai i le faigamalaga.

E pei ona iai le pōwhiri na faatautaia i le maota o le Malo o Niu Sila i Ueligitone ma se tulai faaaloalo a malu o le malo (NZ Defense Force), faapea ai foi le asia e lana afioga o le nofoaga poo le National War Memorial Park i Pukeahu e tauaao atu se pale i le Pacific Island Memorial, e manatua ai foi le tautua a fitafita o atunuu o le Pasefika.