A o sauni atu ai tina i le faamanatuina o le aso faapitoa mo i latou i lenei tausaga, le Mother’s Day ua tuuina mai se faamanatu mo le au faatau meaalofa o le Aso o Tina e ao ona manatua ma silasila foi iai.
Fai mai leoleo ua fautuaina tagata faatau uma ia mataala aemaise lava i faatauga i luga o upega tafailagi.
Fai mai le NSW Fair Trading afai ae le faaeteete le au faatau i luga o upega tafailagi o le a matuai aafia lava i faiga a le au taufaasese.
Ua tuuina mai ai ma ni faamanatu ma se fesoasoani i mea e ao ona mataitu ma mataala ai a o faia faatauga.
O mea e aofia ai le tau o le oloa o loo fia faatauina o le a matuai maualalo ma o le faiga foi o peimeni o lea faatauga o le a tulaga ese foi mai tulaga masani aemaise lava pe a ofoina ane le money order poo le faaaoga atu o kamupani lafotupe.
Fai mai le faamanatu ia faitau ma malamalama i conditions poo tulaga o faatauga atoa ma totogi, siaki le taimi e kiliva atu ai le oloa, faamautu e saogalemu le upega tafailagi o loo faaaogā ma ia faamautinoa o le tuatusi o le upega tafailagi e amata i le https, ma ia tapu’e uma ata poo screenshots o mea sa faatauina ma lisiti.