O le uta o avamalosi lea na aumai i se tasi o malaga a le vaa laupasese o le Lady Naomi mai Amerika Samoa e aunoa ma se pemita faataga, ua faaalia e le Minisita o le Matagaluega o Tiute ma Tupe Maua le Sui Palemia le afioga Tuala Tevaga Iosefo Ponifasio, ua faia le faaiuga e faatautu’i e le matagaluega ma ave seleni e maua mai ai i teugatupe a le Malo.
O le uta o meainu malosi ua mae’a ona sui, ma fagu malosi o le Whiskey Johnny Walker na taofia e le ofisa o le tiute ae faia se sailiiliga i lē na aumaia ia avamalosi o se tagata faipisinisi.
Na laumanuia ai ma le suafa o se faipule o le Palemene peitai sa teena e le tofa Ale Vena Ale o sana uta ona e leai sona faleoloa. Ua na o lana uta o pusamoa na aumai i le malaga lava lea mai Tutuila ae leai sona aafiaga i le uta o avamalosi.
Ua faaalia e le Minisita o le a faaauau pea suesuega i le mataupu ma iloa ai pe faia ni moliaga solitulafono e tuuina atu i le faamasinoga.
O ni tausaga ua tuanai sa iai foi se uta o se pusaoloa na aumai ai foi se uta o fagu malosi o se ituaiga o uisiki e aunoa ma se pemita faataga. O le taunuuga foi na oo iai o le faatautu’i e le ofisa o le tiute.
O tuutuuga o le faatau e le atunuu o ia avamalosi, e faasā ona toe faatau atu ae na o le faaaoga e tagata na faatauina.
