Ua amata nei le faamasinoga o le tina mai Dandenong North i Melepone lea na tuuaia i le alu o lana faatauga i le silia ma le 10 miliona sa tuuina sese atu i lana tusitupe.
O Thevamanogari Manivel ma lana paaga o Jatinder Singh na tuuaia uma i soligatulafono o le gaoi ina ua tuuina sese i le la tusitupe e le kamupani a le Crypto.com se vaegatupe tele i le la tusitupe i le aso 12 o Me o le tausaga na tea nei.
Faailoa i lipoti mai le faamasinoga o se tagata faigaluega a le Crypto i Bulgaria sa tatau ona ia tuuina mai se vaegatupe e 100 o se refund a se paaga a le kamupani ae uma ane ua sese fuainumera ua ta i totonu o le komepiuta ma iu ane ai ua transfer sese mai le 10 miliona i le tusitupe a lea ulugalii.
Fai mai le lipoti na maua loa le tupe alu loa ma le faatauga tele a le tina lea, faatau fale e fa, o taavale ma nisi o meafale, fofogaina foi i le faamasinoga e fa miliona sa transfer i se tusitupe i Meleisia.
Na faatoa iloa e le kamupani le faaletonu i le masina o Tesema o le tausaga talu ai, pueina ai loa le tina lea e toatolu lana fanau i le malaevaalele i Melepone i le masina o Mati o le tausaga nei, maua o le a sola i Meleisia ma ua teena uma nei e i laua ia o la moliaga.
Fai mai ua toe totogi i le kamupani le silia ma le 7 miliona ae silia ma le 3 miliona o loo misi.
