Ua oo mai nei faamatalaga i le tuu ai i luga o le maketi, o le faatau ese atu ai o le faatagata iloga a lē sa avea ma sui o le All Blacks, le alo o Samoa, le afioga ia Laauli Sir Michael Jones.
O lenei faatagata, o se faaaloalo na faatino mo lea tamālii i le tausaga e 2011, e patipatia ai ana taumafaiga aemaise ai le ulua’i sikoa na ia tataoina mo lana ulua’i taaloga mo le Olopeleki i le ulua’i taamilosaga o le Ipu a le Lalolagi na faia i Eden Park i le tausaga 1987, i le taaloga ma le ‘au a Italia.
O lenei faatagata e faapea, na fausiaina i se apamemea, ma e 4.2 mita lona umi, ma le 3 mita lona maualuga, ma lona tau e oo atu i le $330,000.
Ua faamauina i lipoti mai le NZ Herald, o le CBL Insurance e tauala mai le Gordon Brothers, o nisi o tagata popoto i aseta, ua o latou tuuina atu lea aseta tāua i luga o le maketi.
Ae o le vaega o loo popole ai sui o le Eden Park, o le aveese ai o le faatagata mai lea nofoaga; peita’i o lea ua fautuaina e le ofisa sili o le Eden Park, mo se tasi o fuafua e faatauina lea aseta ina ia faatumauina pea le iai o le faatagata i Eden Park.
O se aseta o loo avea ma pine faamau o le taaloga lakapi, ae o se talafaasolopito o lea taaloga i totonu o le atunuu.
Puna o Faamatalaga: https://www.nzherald.co.nz/sport/rugby/iconic-sir-michael-jones-statue-outside-eden-park-for-sale-buyer-can-remove-from-venue/
