Ua iai le popolega i le fuafuaga o le a aumai ai fanau aoga o loo aooga e avea o ni tausi soifua e fesoasoani i le falema’i i Dunedin.
O le faai’uga o le vaiaso talu ai na alu ai le imeli i fanau aoga o loo i le Otago Polytechnic Nursing School ma faatalosaga vave mo se fesoasoani.
O lea imeli na maua e fanau aoga uma o loo i le tausaga tolu faapea i latou faato’ā tausaga muamua.
E lē tele so latou iloa i le galuega ua faatalosagaina ai i latou, ae o loo ta’ua e maua le $200 voucher e fai ai le faatau i le supamaketi.
E iai nisi o fanau aoga e talitonu e lē lava le voucher e totogi ai, a o nisi o loo popole ona e lē lava le iloa poo le agavaa mo le auaunaga ona o lea faato’ā tausaga muamua.
O loo matua’i teena e le faalapotopotoga a tausi soifua lenei faai’uga, ma saunoaga a le peresitene i tala a le leitio a Niu Sila, Anne Daniels, faato’ā latou iloa i le video TikTok.
Ua faaalia ai foi le popole i le lamatia o gasegase ona o lea faai’uga.
Ta’ua e le Te Whatu Ora Health, o fanau aoga ua faatalosagaina la latou fesoasoani e lē faapea o le a faigaluega ai na o i latou, o lea o le a iai lava tausi soifua ua lesitalaina e latou te galulue faatasi.
