A o sauni le Palemia o Niu Sila, Chris Hipkins e malaga mai i Ausetalia nei i le faaiuga o le vaiaso mo le faamanatuina o le ANZAC, o loo tulituliloa e nisi pe faamata o le a iai ni suiga o le a faia i le mataupu ua autausagā foi o finau ai taitai o Niu Sila ia Ausetalia e tusa o avanoa tutusa mo tagata Niu Sila o loo aumau i Ausetalia.
O le talosagaina o sitiseni mo tagata Niu Sila i Ausetalia o se faamoemoe taugata toe umi ona faatali.
E iai ma isi mataupu e pei o fesoasoani e agavaa ai tagata Niu Sila i Ausetalia pe a faatusa i faamanuiaga o loo sapi ai tagata Ausetalia e malaga mai i Niu Sila ma aumau ai.
O loo tulimataia la le malaga atu lea a Hipkins i le faaiuga o le vaiaso pe o le a iai se folasaga logo lelei mo tagata Niu Sila i Ausetalia.
O isi mataupu e talitonuina e ono talanoaina i le va o taitai e lua e aofia ai tagata Niu Sila e toe tipoti ese mai Ausetalia aemaise le maliega a le AUKUS.
