O le aso o loo talitalia ai se tala lata mai I le tulaga o le Moana Pasifika I le taamilosaga o le Super Rugby pei ona faailoa I se lipoti a le RNZ Pacific.
O le masina o Aperila na faamatuu ane ai le laisene mai le NZ Rugby mo le franchise e auai ai I le taamilosaga e lima au mai Niu Sila, lima mai Ausetalia faaopopo atu iai ma le Fijian Drua.
Ole masina na tea nei na fuafua e tuuina ai le faamaoniga o lea mataupu peitai o nisi o mataupu tau tupe, le isi mataupu e aofia ai le Rugby Australia na mafua ai le faatuai.
O loo taua la I le lipoti lea mai le RNZ Pacific o le aso o le a maua ai se tali mautu I le mataupu lea pe faamaonia lava le auai ai o le Moana Pasifika ile taamilosaga lakapi lea ma o le a faamautu ai loa foi ma tulaga o konekarate mo tama taaalo o le au .
O loo fetauaina o le alii sa taalo foi muamua I le all blacks, Aaron Mauger o le a avea ma faiaoga o le au ma Filo Tiatia, ose alo o Samoa, e faiaoga lagolago.
O Mauger e iai foi lona pito Samoa ma Cook Islands. O loo faatalia foi se tulaga o le a iai le au a Fiti le Fijian Drua I le mataupu lava lenei ae o loo fetauaina e foliga ua maua ane se fesoasoani mai le malo o Ausetalia.
