O loo faatalitali pea le aiga o si teineititi aoga lea o loo lipotia mai na ave faamalosia ma faaoolima iai se tagata i se paka i West Auckland.

Na lipotia i le Herald o loo faatalitali pea le aiga lea i se faamatalaga mai leoleo i le mataupu lenei ae e lei maua lava le tagata o loo feta’ua’ina na faataunuuina lea gaioiga.

E 15 tausaga o le teineiti na ave faamalosia mai lo latou fale i Sunnyvale i le aso 19 o Aperila ma faamata’u i se naifi tulou ma tuli faatausi’o i magaala e lata ane ma maua ai i si nofoaga faasao ma osofaia ai.

Faailoa e le tina o le teineititi i le aufaasalalau e uigaese le faataliga o se tali o lenei suesuega ma o loo tumau pea lo latou talitonuga i le galuega a leoleo ae e manatu foi le tina o le teineititi o loo lafi lava le tagata lea na ia faatino lea gaioiga ae o le popolega ona o lo latou manatu e toe foi atu lava le tagata lea i lo latou fale.

Ae o le faamatalaga a le tina i si ana tama fai mai i le taimi na tupu ai le faalavelave sa fai le teineititi i le Atua ua sauni e faatasi ma ia.

Fai mai leoleo o loo fia talanoa i nisi e aumau latalata ane i le nofoaga na tupu ai le faalavelave.