O loo faatalitali pea nisi poo le a tonu le taimi o le a amata ai faigamalaga a se tasi o kamupani vaalele fou ua faaigoaina o le Bonza lea ua o latou folafola ni pasese taugofie mo malaga i totonu o Ausetalia.
O le masina o Oketopa o le tausaga talu ai na muai faalauiloa ai ia fuafuaga mai le kamupani valele ma le faamoeme e oo mai i le ogatotonu o le tausaga lenei ua faagaioi malaga.
Peitai o le iai pea o faatuai ona o loo faatalitalia pea nisi o tulaga e ao ona ioeina mai e le Civil Aviation Safety Authority poo le CASA ina ia maua ai le tusipasi e mafai ai ona faatino faigamalaga, le Air Operators Certificate.
O Tim Jordan le ofisa sili o le kamupani lea na ia ta’ua e le o mautinoa i le taimi nei poo le a tonu le taimi e amata ai malaga.
O le auaunaga a le Bonza o le a ofoina ai se tautua i Kuiniselani, Niu Sa Uelese ma Vitoria.
Ua latou faailoa o le a o latou ofo mai pasese aupito maualalo i le maketi mo tagata malaga.
