O tagata Katoliko i le itumalo o Canberra, le Catholic Archdiocese ua faaalia le lē fiafia i le faaiuga ua faia e le faigamalo a le ACT latou te faagaioia ai le falemai e umia e le Katoliko, le Calvary Public Hospital.
O le vaiaso nei ua folafola ai e le faigamalo lea fuafuaga latou te aveina ai le falemai lea i le itu i Matu o Canberra ma o latou faailoa ai o le fausiaina o le galuega o le a amata i le 2025 se isi falemai fou i le vaega o iai le falemai lea o Calvary ma e silia ma le piliona o le a faaalu ai.
O le aso ananafi lea sa fuafua ai se feiloaiga a le Akiepikopō ma taitai o le Calvary Heathcare e faatatau i le mataupu lea e pei ona faaleo ai le lē fiafia i le faaiuga a le faigamalo.
Fai mai faamatalaga e faate’ia le Akiekikopō i le oo atu o le tala lea ma e foliga e lei fesiligia i sona finagalo i le mataupu.
O loo ta’ua i le lipoti o talanoaga i le va o le malo a sui o le Calvary Healthcare na amata i le tausaga na tea nei i le lumanai o le falemai ma e lei iai se taunuuga lelei na taunuu iai talanoaga.
E iai lipoti ua ta’ua ai foi o le a faailoa i le Legislative Assembly se tulafono i le aso e mafai ai ona faamatuu ane i lalo o le tulafono le nofoaga lea ma aseta uma a le falemai i le Canberra Health services.
O le 2010 na ofo ai le malo e faatau le falemai lea mai le Little Company of Mary Health Care mo le 77 miliona peitai sa le taunuu ona fai mai le faamatalaga o le a umi se taimi e tālia ai se ioega mai le Vatikano i lea mataupu.
